காமெடித் தொடரில் நடிக்கும் பொன்னம்பலம்!

வசந்த் டிவியில் ஒளிபரப்பாகவிருக்கும் புதிய காமெடித்தொடரில் வில்லன் நடிகர் பொன்னம்பலம் நடிக்கிறார். `கன் பைட் கபாலி என்ற பெயரில் உருவாகியிருக்கும் இந்த சீரியலில் கபாலியாக நடிக்கிறார் பொன்னம்பலம். சின்னச் சின்ன திருட்டுகளில் மனம் நிறைவடைந்து விடும் கபாலிக்கு வந்து வாய்த்த மனைவியோ பேராசைக்காரி. எத்தனை நாளைக்கு இப்படி பர்ஸ்களை திருடி குடும்பம் நடத்துவது? பேங்க் மாதிரி பெரிய இடத்தில் கொள்ளையடித்தால் தானே நாமும் கார், பங்களான்னு வாழ முடியும் என்கிறாள். கபாலிக்கு அதில் உடன்பாடில்லை. எனவே எனக்கு அதெல்லாம் சரிப்பட்டு வராது, என்கிறான். மனைவியின் தொல்லை தாங்காமல் வங்கிக்கு கொள்ளையடிக்கப் போகும் கபாலியை ஊரே பாராட்டுகிறது. அது எப்படி? என்பதை கலகலப்பாக சொல்லியிருக்கிறது கன் பைட் கபாலி தொடர்.

இந்த சீரியலில் பொன்னம்பலத்தின் மனைவியாக பிரேம் பிரியா நடிக்கிறார். வெற்றி, பெஞ்சமின், போண்டாமணி உள்ளிட்டோரும் நடிக்கிறார்கள். இந்த தொடருக்கு கதை எழுதி இயக்குகிறார் டைரக்டர் ஜெயமணி.