சந்தீப் சிங் ஹாட்ரிக்: இந்தியா வெற்றி

புதுடில்லி: ஒலிம்பிக் ஹாக்கி தகுதிப் போட்டியில் இந்திய ஆண்கள் அணி, பிரான்சை 6-2 என்ற கோல் கணக்கில் வென்றது.
லண்டன் ஒலிம்பிக் போட்டியில் பங்கேற்பதற்கான ஹாக்கி தகுதிச் சுற்று ஆட்டங்கள் டில்லியில் நடக்கின்றன. நேற்று நடந்த ஆண்கள் பிரிவு போட்டியில் உலக ரேங்கிங் பட்டியலில் 10வது இடத்தில் இருக்கும் இந்திய அணி, பிரான்சை(18வது இடம்) எதிர்கொண்டது.
துவக்கத்தில் இருந்தே இந்திய வீரர்கள் தாக்குதல் பாணியிலான ஆட்டத்தை கையாண்டனர். தொடர்ந்து 3 கோல் அடித்த சந்தீப் சிங்(9, 30, 37வது நிமிடம்) ஹாட்ரிக் சாதனை படைத்தார். சிவேந்திர சிங்(4), சுனில்(39), துஷார் கண்டேகர்(62) தலா ஒரு கோல் அடித்தனர். போராடிய பிரான்ஸ் தரப்பில் லூகாஸ் செவஸ்திரி(35), பாபியன் மாக்னர்(57) தலா ஒரு கோல் அடித்தனர். இறுதியில் இந்திய அணி 6-2 என்ற கோல் கணக்கில் வென்றது. இதன் மூலம் தொடர்ந்து மூன்றாவது வெற்றியை பெற்றது. இப்போட்டியில் அசத்திய சந்தீப், அதிக கோல்(7) அடித்தவர்கள் பட்டியலில் முதலிடத்துக்கு முன்னேறினார்.
மூன்று போட்டிகளில் வென்ற இந்திய அணி, 9 புள்ளிகளுடன் முதலிடத்தில் உள்ளது.