பிரபல இந்தி நடிகர் ராஜேஷ் கண்ணா கவலைக்கிடம்!

இந்தி சினிமாவின் முதல் சூப்பர் ஸ்டாரான ராஜேஷ் கண்ணா உடல்நிலை மிகவும் மோசமடைந்து கவலைக்கிடமாக இருக்கிறார். 1966-ம் ஆண்டு அஹாரி காத் என்ற படம் மூலம் இந்தி சினிமாவில் அறிமுகமானவர் நடிகர் ராஜேஷ் கண்ணா. தொடர்ந்து ஆராதனா, ராஸ், பரோன் கே சப்னா உள்ளிட்ட 150க்கும் மேற்பட்ட படங்களில் நடித்துள்ளார். 1960-70களில் முன்னணி கதாநாயகராக ஜொலித்த ராஜேஷ் கண்ணா சில படங்களை தயாரித்தும், சில பாடல்களை பாடியும் உள்ளார்.

தற்போது 70வயதாகும் ராஜேஷ் கண்ணாவுக்கு கடந்த ஒரு வாரமாகவே உடல்நலக் குறைவு ஏற்பட்டு தனியார் மருத்துவமனையில் அனுமதிக்கப்பட்டு சிகிச்சை பெற்று வருகிறார். இந்நிலையில் கடந்த மூன்று நாட்களாக உடல் உணவு உட்கொள்ளமுடியாமல் அவதியுறுவதாகவும், தீவிரசிகிச்சைப்பிரிவில் அனுமதிக்கப்பட்டுள்ளதாக அவரது மேலாளர் அஷ்வின் தெரிவித்தார். மருத்துவமனையில், ராஜேஷ்கண்ணாவின் மனைவியும் நடிகையுமான டிம்பிள் கபாடியா, மற்றும் அவரது இருமகள்கள் டிங்கிள் கண்ணா, ரிங்கி கண்ணா ஆகியோர் உடனிருந்து கவனித்து வருகின்றனர்.